லிபியா மோதல்:அல்ஜஸீரா கேமராமேன் பலி

March 14, 2011.... AL-IHZAN World News
கிழக்கு லிபியாவில் எதிர்ப்பாளர்களுக்கு அதிக செல்வாக்கு மிகுந்த நகரமான பெங்காசியில் நடந்த தாக்குதலில் அல்ஜஸீரா தொலைக்காட்சியின் கேமராமேன் கொல்லப்பட்டுள்ளார். அவருடைய பெயர் அலி ஹஸன் அல் ஜபேர்.

பெங்காசிக்கு அருகே ஹவாரி பகுதியில் இச்சம்பவம் நிகழ்ந்துள்ளது. லிபியாவில் அரசுக்கெதிராக போராட்டம் துவங்கி முதல் முறையாக ஒரு வெளிநாட்டு பத்திரிகையாளர் கொல்லப்பட்டுள்ளார் என்பது குறிப்பிடத்தக்கது.

அலி ஹஸன் அல் ஜபேரை தாக்கியது யார் என்பதுக் குறித்து அல்ஜஸீரா தெரிவிக்கவில்லை. ஆனால், இக்கொலைக்கு காரணமானவர்களை வெகு விரைவில் சட்டத்தின் முன்னால் நிறுத்துவோம் என அல்ஜஸீராவின் டைரக்டர் ஜெனரல் தெரிவித்துள்ளார்.

ஹவாரியில் எதிர்ப்பாளர்களின் போராட்டத்தை படம் பிடித்த பின்னர் பெங்காசிக்கு திரும்பும் வழியில் ஜபேரின் மீது தாக்குதல் நடந்தது. ஜபேருடனிருந்து இன்னொரு நபருரையும் துப்பாக்கிக் குண்டு தாக்கியது. இருவரையும் மருத்துவமனையில் அனுமதித்த பொழுதிலும், ஜபேரின் உயிரைக் காப்பாற்ற முடியவில்லை.